Do Aankhein

Badi Bhoori Bhatki

Ainak ke peeche chupi do aankhein

Chehre ka hissa par har hisse se judaa

Kuch kuch sachchi kuch jhoothi do aankhein

Na jheel si gehri na os si thandi

Formals pehen roz office jaati do aankhein

Yun duniyadari ka chola odhe

Kuch kuch ordinary kuch special do aankhein

Chashme ki kaanch mein raaz chupaati

Aaj ke zamaane si dogli do aankhein

Excel sheets aur Ghalib ke sher padhti

Kuch kuch practical kuch emotional do aankhein

Bin kahe bin sune

Pechida gehri baatuni do aankhein

Kabhi thehri si kabhi behki si

Kuch kuch jali kuch boojhi do aankhein

Shayad hi kabhi chalakti hongi

Saara dard chabaa leti do aankhein

Fifty shades of grey ke jaise

Kuch kuch sahi kuch ghalat do aankhein

Dekhti Taakti Ghoorti

Rooh tak jhaank paati do aankhein

Ishq kar na jataane ka jazba rakhti

Kuch kuch janaani kuch mardaani do aankhein

Ek nazar se mere saare usool tod deti

Mujhe knees mein weak karti do aankhein

Kabhi tujh pe kabhi mujh pe kaboo karti

Kuch kuch humsafar kuch humnawa do aankhein

Har baar meri aankhon se guftagoo karti

Teri beparwah do aawara aankhein

Kabhi paas bulaati kabhi door phenk deti

Kuch kuch sawaal kuch jawaab do aankhein

Dil se mere ek taar juda hai unka

Ussi taar ka faayda uthati do aankhein

Meri bekaraari ki wajah, mere dil ka sukoon bhi

Kuch kuch tameezdar kuch mawaali do aankhein

Jodti todti marodti

Har rishte ko roomani banaati do aankhein

Na samaj ki samajh na kanoon ki kadar

Kuch kuch wafadar kuch bewafa do aankhein

Ainak utaarke unhe jee bhar ke dekhu

Ghotke pee jaaon aisi do aankhein

Mujhe mere aks se waakif karati

Kuch kuch kaafir kuch khuda si do aankhein