Ek nayi subah, Ek naya bistar

Agli subah gadda waise pada tha,
Bistar mein tumhara samaan bikhra hua tha,
Chaadar ki silvatein hati nahi thi,
Takiya bhi so raha tha raat ki neend poori karne...

Baithi thi main kamre ki ek kone mein,
Maathe pe shikanj aur ashk bhare aankhon sang,
Guzre palon ko sametne ki nakaam koshish karti...

Kuch na soojha toh gadde daal diye chhat ki dhoop mein,
Chaddar badal diye aur takiye bhi,
Kal raat ke bache kuche palon ko phek hi diya tha,
Ke kambakht kamre ki boo ne phir se tumhari yaad dilaa di...

Ek dibbi, Ek pitara

Kajal ki ek dibbi
Yaadon ka ek pitara

Dibbi kholke kajal lagaya
Pitara khola toh saara kajal beh gaya

Chota Panchi

Chota Panchi
Choti aashayein, Chote sapne
Chote chote pankh

Uddne chala woh khule aakash mein

Khula sa akaash, phaila sa akaash
Panchi ke pankh pad gaye chote
Gir pada Chota Panchi
Chote sapne bhi aur choti aashayein bhi...

New Din, Naya Feel

Baarish ke paani mein ek refreshing bath ke baad
Hawa ke dryer se kangi karoon
Sooraj ke aaine mein apna final look dekh
Nikal padoon akaash ke round lagaane
Pocket mein ho kuch badal aur kuch memories
Na bijli se daroon, na hailstones se
Bas apni khwaishon ki scooty bhagaaon aasmaan ki racecourse par...
TEZ BOHOT TEZ

Ek

Ek maili chadar
Ek sakht takiya
Ek thakaa jism
Ek jalta aasoon
Ek adhoora khwaab
Ek lambi raat
Ek akeli MAIN