SOUTEN

Der raat ko tumhe call karne ka dil toh karta hai
Par tumhare kaandhe ke bal soye huye tumhari wife ka khayal mujhe rok leta hai

Din bhar ke kaamon se thak ke choor hogi woh
Tumhare garm saanson ko odhe khush toh zaroor hogi woh

Mobile ki ghanti se ya SMS ke tone se disturb ho gayi toh
Itni raat ko tumhara phone bajta dekh hadbada si gayi toh

Uske narm khwaabon ko todna mere bas ki baat nahi
Raatein tumhari exclusively uski hai, unmein mera koi legal hissa bhi nahi

Jaanti hoon tumhara subah ka pehla khayal mere naam likha hai
Sawere tumhe dekh woh mehek uthe toh woh khushboo uski bewafa hai

Subah ki haqeeqat waise bhi kadi dhoop si sakht hogi
Aadhe bante huye iss rishte ki chaabi na uske na mere paas hogi

Tumhare “I love you” ki msg se mere mobile ki neend khulegi
Tumhe phone pe busy dekh who chai ka cup side mein rakh degi

Tumhare white shirt pe lage orange lipstick ke daag ko woh Tide se ghis ghis ke dho degi
Badla lena ho toh button see ne ke baad bache huye dhaage ko zor se daant se kaantegi

“Bye” bolte huye tumhe jaldi ghar aane ka vaasta zaroor degi
Par aadhe drunk tumhare ghar lautne par uff tak nahi karegi

Uske sacrifices ke bojh dhote dhote mera dam ghut ta hai
Meri parchhai ki haqeeqat kaiin baar aaina mujhse poochta hai

Toh ek tarfa sauda karne ka soch liya hai maine
Jaise na badle hamara aadha sa rishta na badle uske maayne

Tumhare har cheez ka maine khaate pe hisaab lagaya hai
Uske aur mere beech tumko equally divide kar diya hai

Tum uske tumhara dil mera. Raatein uski har din mera.

Kapde uske khusboo meri. Choodi uski khanak meri.

Khaana uska niwaala mera. Baatein uske khayal mera.

Laptop uska wallpaper mera. Ghar uska aashiyana mera.

Tohfe uske khat mere. Rishta uska jazbaat mere.

Naam uska shaksiyat meri. Shaadi uski wafaa meri.

Yeh mera legal contract toh ab taiyaar hai
Par iss kagaz pe kiska dastakhat loon ab yeh sochna hai

Tum toh shayad phaad ke phenk doge isse
Tumhari wife ko courier karne ki himmat bhi na hogi meri

Pagal hi hoon main jo raat ko apne ghar pe akele baith contract banaa rahi hoon
Hamare behrupiye rishte ko naam dene ke liye kalam aur kaagaz waste kar rahi hoon

Jab suljha nahi sakti iss complicated si gutthi ko
Toh rishte uljhaane ka blame khud pe kyun loon

Better hoga ke raat ko tumhe call karne ka idea hi drop kar doon
Aur iss stupid poem ko yehi khatam kar doon

Sauten ki identity ko takiya samajh kar hug karke akeli bed pe let jaati hoon
Kal subah ke tumhare pehle khayal ka wait karne ka try karti hoon
Apni fake si life ko real samajhke chan ghante be-chain ki neend so jaati hoon