Akeli Jhumki

Ek bhoole daraaj mein padi thi EK AKELI JHUMKI
Dekhte hi use saamne waali khidki se dikha ek gehra bhoola samandar, yaadon wala

Kitna khoja karti thi main uss jhumki ki saheli ko, jisko kho diya tha kahin kissi roz ek nadaan se pal mein...
Kabhi Dilli Haat ke har jhumke waale ko poocha
Kabhi Bandra ke har chote bade shop mein dhunda
Akeli Jhumki ko dikhaake tooti phooti "bengali" mein samjhaya tha uss "maushi" ko
Yahan tak ki choda nahi maine Europe ke "Indian" dukaano mein khojna, poochna, dhundna
Bareilly tak jaake aayi par jhumki ki saheli na mili mujhe

Par kyun pagalon si dhund rahi thi main usse?
Waise to kitne saare rang-dhang waale jhumke pade the mere dressing table ke drawer mein??

Jhumki toh sirf bahana tha
Dhund toh rahi thi main uss guzre pal ko..
Jab tumne mujhe apne haathon se pehnaye the woh jhumkiyan..aur hans kar jhoom rahe the dono saheliyan...
Kaha tha tumne "Jhumkiyon ki yeh kilkariyan mujhe achi lagti hain...aur tumhare kaan khali ache nahi lagte.."

Aaj woh ek akeli jhoomki padi hai ek bhoole daraaj mein
Aur saalon se mere kaanon ne jhumkiyon ki kilkariyan nahi suni